Эвенкийские героические сказания: Храбрый Содани-богатырь. Всесильный богатырь Дэвэлчэн в расшитой-разукрашенной одежде. - 1990. [Т. 1.]

Тэтты̄-дэ̄ тэты̄вй ōты̄нан аявāн Дылдукин һалгамāктӯн умун дэкси, Некэ̄-бэйӈэ̄ нандадин биксэ̄, 230 Аяргӯмадин ōвчā саӈияккй Дылачā тогомодӯн эрэгэмэ Э̄һӣ ичэвкэ̄нэ чэвэр Ая аһāткāн ōрдага. Нуӈан дагава-да һавāя āчин Э̄һӣ тэһийдэ дōдуккй Курбōӈнолон мёвалкāн, Ēмӣ-дā бэе ōрй Увагас сэ̄ксэдук ōнйлкāн, Тыйис сэ̄ксэдук тэкэлкэ̄н 240 Ая аһāткāн ōдан. Э̄рэ̄-тарā-дā сāрӣ миндыр Ая дялба мэ̄нин Дōдукки син сōт сāрӣ Саягас дялилкāн биӈэ̄т Аһāткāн-куӈāкāн ивит Эр ая аһӣ Ая̄кчāн Ивēкчāн Гунмурй киливлй биһэмдэ. Де тар амардукин Эр дю̄р нэкӯнэн омолгилкāн һунāт, 250 Э̄р ōкин-кат эһӣ һокоргоро Чӯтурйн солкомо чӯкалкāн Дулин энин бугадӯ Иркин бэю̄н дю̄р иегэчйнин Умундӯ дёрэлэснэл балдыксāл, Горово-дō бинэвэр эчэл сāра, Дагава-дā бинэвэр эчэл сāра, Де эргэчӣр ая ирэндэлкэ̄һэл Э̄лэкэс илнӣ ая иччат биксэ̄ Екун анал сōһулкэ̄һэл биркэл 260 Гуннэ эр эēнэ̄ бираӈӈатын Дэрэ̄ндукин дāптумāктӯн Аямат пэрйнэ ичэмй, Эр эēнэ̄ бира эӈэ̄рин Э̄Вэды̄ орон сōһу эймэ̄кēмэ ивит, Сēктāгин сирӯткāр орор Сēиланды̄ иелтын йгин сб ивит, Улгэнмунэ ōскēчэ̄ мучук урэлин дурукин Кувэ̄һэл орор куртэ̄гмэ ивит, Чāлбӯг урэкэ̄рдӯн чāлдыл актал 270 Иелтын чавāкēма ивит. Нӣвэ̄г лāйдалин бутуннӯн Гулур актал гудēē-вэл ивит. Де тариӈилвӣ биһэмдэ Э̄р ая аһӣ Ая̄кчāн Ивēкчāн киливлй