Мифы, сказки, предания манси (вогулов). - 2005. (Т. 26.)

6 Ань та ōйка котьлягитэ осты нёхыс сахи, ӯй сахи юнтуцкве ӯнтылматас. Та юнты, та вāри. Сахитэ нōх-масыс. Сянягён āсягēн осты титыглаӈкве патвес — Хоталь минэгн, нōх-масгалахтэгн? — Хоталь минэгм!? Нōх яныгман элмхōлас хум минам хумыӈ мā тинсы, нэ минам нэӈын мā тинсы. 7 Кон квāлыс, колэ титсёс мувылтастэ, колсыс лёӈхе хосыт та ёмантас. Ань колэн осты ёхтыс, сунсыглахты: увситэ пуӈксов кон ханы! — Вассыг ман, люляхōлтēмт! Хоталь минэгум? Сялтэгум юв. Юв сялтыс: порссыӈ, люль. Нāй тӯсьтыс. Сёпитытэ, колкан хосгиматэ пӯрысь нёвыль сырам хōнтыс, юв та вōтытастэ. Пуӈке, самэ мāньмытас, ёл та хуйыгпас. 8 Тул-Ōйка ты ёманты, сунсы: колэ султмыл пāйтахты, номсалы: «Колм хотютн та пāлтыма!» Ос āвисӯнтн ёхтыс, юв сялтыс, сунсы: нэ хуйи, пуцке саме мāньмытам. Нёхсэ, ӯе та нуйгалыянэ. Пӯт пēтыс, пӯтэ āстыс, пӯтэ хӯныстэ. Акв ōвлэ нэ касайыл пиныстэ, акв ōвлэ хум касайыл пиныстэ, лāви: — Я-та, ам нупылм ōлнэ номтын те ōлы, квāлэн, тāйен! 9 Аньнэ нōх та квāлапас, вассыг ман! Тэӈкв та ӯнтылматас. Ань хумитэ потыртацкве патыс — Ам лэстанрисюм хōнтыгласлын? — Ая, — лāви, — кол сёпитымам акв пӯрсь нёвыль сырам хōнтыгласум, юв тāяпаслум. (Тамле мат лэстаныл ōлы?) Ōйкатэ нэмхотум ат лāви. Ойкатэн ханисьтавес — Холытан ам минэгум, вōйыӈныл вōйыӈ нёвыль пēтэн, кол ко- нытэ сэмыл нуйыл нортэлн, юитэ выгыр нуйыл нортэлн, акв āны кон ӯнтгэн, акв āны юв ӯнттэн. Āныягын ӯнттэгн, пуӈкын, самын мāньмытэн, ёл-хуйыгпен, нōх ул āцкватэн! Увсьтен аквтох та кос ха- нисьтаслум, лāтыӈ ат хӯнтлас. Тэсыг, āстысыг, ёл та хуйыгпасыг. 10 Холытан квāлсыг, ань ōйкатэ āлпыл масапахтас, энтапахтас, та мйнас.