Мифы, сказки, предания манси (вогулов). - 2005. (Т. 26.)

— Ат вāглум, ōс пӯт вāруӈкве патэгум, кол алан та хассутāвем. Матыр лӯраты, лӯрги. Ягпыге лāви: — Та сир, холытан ам юв тӯйтхатэгум. Юв тӯйтхатас ань хум холыт хōтал. Увситэ та юнты, та вāры. Пӯт вāрнэ поратэ ёхтыс. Пӯт вāруӈкве пāлныл нāлув вāглыс, ōс пуӈксовēныл нōх ты хассумтāвес кол алан. Нōх-хассумтāвес ань нэ. Ягпыге сунсы: силыӈ кāтпал кол аланыл нэглум. Ань нэ ягпыге сырае вис, ань кāтпал сāграпастэ — силыӈ кāтпал. Вистэ кāтн, ягāгитэ ну- пыл лāви: — Ехытлаттāл хӯрыг паттан пинэлн, ёхытлаттāл тōтап паттан пинэлн. Ты кāтпал те хоттютн мыгн, нац āнум сусмын тый, ам науын сусмум тый. Увситэ ань кāтпал вистэ, ёл та сёпитастэ. Та ōлэг, та хӯлэг. Холытаныг ēмтыс, аквмат эртн Мāнь-Мōсьнэ юнысхаты. Āвиныл нэ коныл нэглыс, рōӈхи: — Āпситем силыӈ кāтпал тыг маēлн. Āпситем ты хōлы. Ань Мōсьнэ лāви: — Матыр элмхōлас колын ёхты, коныл хунь рōӈхи, юв сялты. Ань нэ хотгаль та тахас Ань холытан аквта нэ осты ёхтыгпас, ōс аквтох коныл рōӈхи. Мāнь Мōсьнэн вōваве: — Юв сялтэн. Юв ат сялты нэ. — Ягпыгн юн ōлы. Ам ат сялтэгм. Таитэт хотталь та тахас ōс. Тувл ōс ёхтыс. Я-та, акв лāглэ юв тӯсьтыстэ, осты рōӈхи аквта сирл. Ань Мāнь-Мōсьнэ лāви: — Юв сялтэн. Аквмат эртн юв лāсьлакве ты сялтыс Ань Мāнь-Мōсьхумн та пуваве. Ань Мāнь-Мōсьхум ёрыг ēмталанэт порат кол патган ёхталэг. Порнэ ёрыг ēмталанэт порат кол āвин ёхталэг. Аквмат эртн — Мāнь-Мōсьхум эрыг тотуӈкве, мōйт тотуӈкве лāввес — кол патта нупыл таитэ та воськасастэ, ёрыг ēмтыс Ань Мāнь-Мōсьхум лāви: — Ань ам нопылум та патсын. Тōрум ōлнэ юртыг та выглум. Ань Порнэ та ōлмыгтас Мāнь-Мōсьхум палт.