Мифы, сказки, предания манси (вогулов). - 2005. (Т. 26.)

Я, кон та люляхōлсыг, аквэрт лāви: — Я, сялтымён. Юв сялтсып āны хӯнхатам, хоталь ōлнэ тāюм-аюм нас сāв! Я, тэнэтэн, айнэтэн халт колыц хумитэ потырты: — Ам потыртан юрт ат эсьсум. Ам сāт āмпар тāгыл тэнут ōньсēгум. Манурыл холэгыт, нац холнэ мат писяныл ат вāгын? Сярык мувылтаӈкве патэгум, сāт хōтал мувылтэгум. Ань Нусатэ лāви: — Ам потыр ōньсēгум. Нац, — лāви, — та сирл ōлэн: тэгн, āстэгн, āнын лаёлн, пӯтн воськасэлн, ул ловтэн, ул сыстамтэн. Я, тэсыг, астысыг, ань ōйкатэ пӯтэ кональ та воськасастэ, āнытэ пāгле та воськасастэ. Тувл лāви: — Ам минэгм, ты хōталыл сāтыт хōтал юв усь ёхтэгум, сяркум мовылтэгум. Та мйнас. Акватэ лāви: — Нац минэгн, ам ос манарум тэгум? — Нац, — лāви, — ам палтум рӯпитэн. — Рӯпата манхурипа, мāныр рӯпитэгм? — Рӯпата мāныр, нац нāйвōвл сāгрен, вит сёпитэн. 6 Я-тэ, та мйнас, лāви: — Ты хōталл сāтыт хōтал āнум ӯрēлн. Я-тэ, тав тай та хӯльвес, нāйив та товриты, вит тотыс. Ань мōлал акватэ лāви: — Пӯтум, пēтхатэн, пӯтум, хӯнхатэн. Та хӯнхаты, та пēтхаты. Тав та кос ляганты, акваг ат пēтхаты, акваг ат хӯнхаты. Я, тувл такви та пӯт пēтыс, ань акв лэцн нёвль пāйтнэ пӯтэ та пēтыстэ. Пӯтэ тэстэ, айыстэ, пӯцте мāньмытас, ёла та хуйыгпас Нōх-квāлыс, пӯтэ ёмсякв сыстамтастэ, ловтыстэ. Ань акватэн лāвим утанэ та холасыт. Пӯт хантанэт пӯт вāруцкве та патыс. Тэпялас, āстыс, лāви: — Ам ань лāввēсум, — рӯпитэн! Матыр ю с рӯпитанувм. Кон квāлс, нāйвōвл, витлōмт сёпитас. Акв хумитэ тыт рōцхувлас: — Хōттēпыл сяркум мāниг та ēмтум — хӯрум хōтал тӯп мовыл- тасум!