Мифы, сказки, предания манси (вогулов). - 2005. (Т. 26.)

17 Хōн-Пыге титыглы: — Наӈ, — лāви, — хōнтласын? Эрӈ, нāӈ вāрум сāвитн та? — Тавāгг, — лāви, — аквёт ялымēн. Усэн мувылтацкве патсыг. Хōт кāтэтыл няхнут, тот няӈхи, хōт лāглэтыл няхнут, тот лāглэтыл няӈхи. (Элмхōлас ань тайи мāгыс тōва накт луве хот та сакваты, тав ты писит вāрыгламе мāгыс.) Вāнька лāви: — Нāн тох хот савалэгын? Манарн ёхталавесын?! Лылыӈ витуп тӯр ōлы. Аква тув вое ялы, тот вое ловтхаты. Пусми те, пуссын тот ловтхатэн! 18 Тувыл та хӯльсанэ кāтаныл, лāгланыл рāтым утанэ. Минасыг аквёт. Акватэ мāныр вāрыс, таит сунсыглы. Хоса минасыг, вāти минасыг, аквмат эртн Вāнька лāви: — Ам та пāсумн ты ёхтысамēн, ам хōнтлам мāмт нэматыр пōс ат хӯльсум. Минымамēн лув лāгыл ёт Мōсьнэ сāс налпа касайсуп ос сэпсāнысуп нōх те рагаты — та! 19 Хоса минасыг, вāти минасыг, тав пāсэн ёхтысыг, сунсытэн: акв нэ люли. Нэ нупыл титапас — Нац хумус хультсын? Ам нэматыр ат хӯльсум. — Ам, — лāви, — касайсупум лāсиглэгум. Лувēныл ёл-вāглуӈкве хурахлы, номсы, эрӈ матыр мутра ōньси. — Ам сунсэгум, ты кол ёрт равтасьлахтэн, тыт ат хōнтылын ка- сайн? Нэ равтмыгтас, сэпс āнысупе нōх-рагатас, иц касае! 20 — Наӈ хумус хультсын? — Ам хумус хультсум? Нац мōлал лāвēгн: «Ам эрнэ āги те ōньсēгум, эрнэ пыг те ōньсēгум, мā сов ёлыпāлн вое еялты». Ам мā колрись ōньсēгум, тот та хультсум. Нэ хōтпа ёрыл кол вāруӈкве хунь вёрмёгум? — Наӈ мāныр тāйим ōлэгн? — Кирсени-Аким-Ōйка хōн палт рӯпиты. Тэнатэнл арыгты нянь саквыт, таит тāйим ’та ōлэгум. — Тāн наӈ палтын хумус ёхтэгыт? — Тан мāпорыс сӯп тӣвырт ам палтум тотāвет.