Фольклор удэгейцев: Ниманку, тэлунгу, ехэ. - 1998. (Т. 18.)

догбони диэлиэни, эими дэумпи-дэ. ОмосЬ буаду, ту улиду багдими, улифЬ дактианами сағалиани; утэми эими улилэ до, диэлиэни. 10 Диэлими, диэлими, омо мамакава исэни, ңич'аи на буғасадини омо бэгдизи хэңдэсэини. Гайа кэси гэлэлиэни: — Мама, минэвэ дбванайа наңилаи! Мамака ту эсини чинда. Бими, бими, чалани, н>аңга таула ңэнэни, буанани буми гайа дблани. 11 Бими, мамака гайава игбэсилиэни, элуэни ңича наду кэсэкчэми. Гайа диэлимиэ, нава чофолони, мэнэ илиэндилэи. Диэлими, диэлими, чофбдиғини на тиңмэнэни. Эи на тиңмэнэндилэни чум-чум сагди на баг- ди. Ту диэли, ту тугбули бни. 12 Ути на багдиандилани ситэнэти багдинати, мэнэ-мэнэ мамасази, мафази. Ути багдина-гэту мэфэи гэгбисилиэти: удиэ нйни, ниңка нйни, гаули нйни, ибэнэ нйни. Ута-бэдэ багдиати, мэнэ-мэнэ надифаи, омо амидиғи, омо әнидиғи багдиа ситә-гәтузиғә. 59. СИҢМУ ТЭЛУҢУНИ. I 1 Боло бисини, вакчанами ңэнэти Хуғу сигбо элэни. Утала вакчана- ми, омосЬ нй хэбусини синацуи (мафас'а ваивани токтолами) агби бй кусиғәвә, ниңка нйни ута-бэбуи кусиғәзи токтоини. Ңэнэмиэ, ңэнэмиэ, ту туктиэти, ту туктиэти, киаи-киаи сигбола туктиэти. Зиэлэни инати, гула бисини. Ути гуладу сиңму сагдини бисини. 2 Ути ңэними-дэ, сиңму-дэ мэдэни; на сиңмуни бисини. Мэдэндилэи сиңму ванзи осини. Ути бохо нйни сусалиани. Огдолини тукиани. Ути огдондилини тукиами, н>аңга имэмуэни. Хэгэихи тукиами, тугэ бЬнои- ни, огдондилини тукиами, н>аңга амиасани. Йэвэ-иэвэ йэи, огдом'аси, хэгэихи, огдом'аси, хэгэихи, ту тукиани, ту сусани. 3 Ту тукиани. Тукиамиэ, Ата улилэни йгиэни; Хуғу датани со- лозалани биэ ‘аса датани. Гэ, оно йазаңа, будэли одо?! Ути ‘асава дауғиани мэнэ тиэузи. Ули т'аңкидини тиэуни на диоихини ңэнэни, ну- ани-тэнэ ңэниэни, мэнэ зугдитиғи ңэниэни. Баигда эсини ата, сакиази тундэлиэни, сакиази йактаси бни. 4 Элэ маңга 6 ‘ами, синаи вэнтилэни, сиңмуңи утаду имэмуэни. Ути ута-бэдэ уйагиани синаи вэнтилэнзи. Кусиғәвә сина мэңдэ ниңмэлэни, утэми сиңму будэни.