Эвенкийские героические сказания: Храбрый Содани-богатырь. Всесильный богатырь Дэвэлчэн в расшитой-разукрашенной одежде. - 1990. [Т. 1.]

Тыкэ̄н гуннэ тӯрэ̄чӣ бран: «Гирō-гирō гирōкāнин! Мэӈтыкэ̄мэ укчакив, 470 Эр бугалā иһивдалāвй Минэвэ сбт дэрумкӣвкэ̄нинды. Тэдемэ бй гиркунма гиркурйдӯв Анал укчакив бирдэгиӈ. Ноноптын баһӣва бигин, Амаргӯптын алгис ōгин! Ēкума-кат ӣлтэнды̄ туксугучйн албаһилкāн Эгин синэ бакара, Суптырй туксугучйн кувулгатылкāн Э̄гин синэ кēйда. 480 Оӈковӣ оӈкокол, Аят дэрумкйкэл! Минэвэ сōӈку бэе бинэ Сāма тӯрэ̄нмэ эчэ тӯрэ̄ттэ гундиӈэ̄с. Бӣ синдӯ эрбэлдэли эмэдиӈэ̄в гуннэ Болдёрйвй эчэв сāра. Илан тугурук анӈанйлй Ēми-кат сāвкāндиӈāв! Тадук чāгӯвāн гиркудянал Будэрӣӈӈи инэӈйӈӈӣ эмэрэкин, 490 Иччилэ̄к тӯрэ̄нмӣ эдындӯ уӈиӈнэкэл. Идӯ-дэ̄ бимй этэ̄м йлтэнмурэ. Бӣ ня̄н синдӯ Буды̄в эмэрэкин сāвкāндиӈāв», — Гуниттэн эр орон һунӈирāнин. Тыкэ̄н гуниксэ̄, бэеӈку бэе Дюлэвӣ ӈэнэвкэ̄ндерэн. Орон сбһун биһэмдэ Оӈковй оӈконо эмэ̄нмурдэгэ. Эр мит бэеӈит биһэмдэ, 500 Де эргӯ бугатын Он биргӯн гуннэ Чӯкавāн-мōвāн ичэттэкин, Дурукин того дэпнэгэчйнин Дӯндэлдулэ̄ иһиксā, Ӈэнэвкэ̄нмӣ-ню̄н ӈэнэвкэ̄ндердэгэ. Дылачāн бимӣ бēга-ню̄н ӈэ̄риливкэ̄нды̄нин Буга ивит тар бугатын, Ēкун-да һактыра бугалдулā истан, Ӣду-дэ̄ 510 Олгōкин дундэ ачин Дурукин лэвэ̄ буга бивкй ивит. Эһилэ эр ӈэнэдерэкин, Э̄ргйт-таргӣт һоктол Эмэнэл-эмэнэл колбосчōл ивит.