Эвенкийские героические сказания: Храбрый Содани-богатырь. Всесильный богатырь Дэвэлчэн в расшитой-разукрашенной одежде. - 1990. [Т. 1.]

Де тарā ичэксэ, 1280 Эр Иркинйчэн мāтā Аракййа āчин соктōрон, Соктōё āчин йрилдэн, Э̄лй-талй туксаран. « Ēкун эһӣн ичэврэ Илтэнды̄ туксугучйн албаһилкāн Илэ авāһин, Суптырӣ туксугучйн кувулгатылкан Илэ огēӈāн, Э̄мэксэ, эксэчэ̄ бирдэгэй?» — 1290 Гуннэ эр сō бэе СŌдāнй мāтā Балдыдя̄кин эēнэ̄ бираӈӈан Дāптудукин дэрэмэ̄клэ̄н Баргӯ-миткӯ урэлбэ̄н Э̄нэ сулāра умнэ̄кэ̄мэ пэрӣһинэн-дэ̄ Ēва-дā эчэ сāра. Де тар амурдукин Э̄һйт ӯтэ̄ндӯлэ дюпты̄ пэрйнэ эмэксэ, Э̄дергэвчэ̄ ӯтэ̄нмэ аят ēруктанан, Арай умун мбдӯн 1300 Илан оһикта удян биһин ивит. Тарā ӣртыкӣ ю̄лгилкāн Дэгӣ биркэ гуннэ, Аят ичэнэн биһэмдэ, Дылачā йктэмэвэн ӈэнэри Дэгй биӈэ̄т ивит. Де таркāндук сэрэйдэн-дэ̄ (Удадиӈāн дō нимӈāкан биксэ) Мит бэеӈит Иркимэктэ иркин бэюн авдӯлкāн 1310 Иркинйчэ̄н гунмурӣ мāтāткāн Иркимэктэ иркин бэю̄н авдӯвӣ Умнэ̄-дю̄рэ̄ эӈтэвкэ̄һинэн-дэ Иркимэктэ иркин бэю̄н авдӯн Ичэһиниксэ, һурумдиӈā эвгидэ̄лйн, Тӯрэ̄һиниксэ̄, эрйһиндиӈэ̄ эвгидэ̄лӣн Эр-дэ̄т умутōккōтно, лэлӯкэ̄тнэ эмэксэ̄, Дюлэдӯн дергэс илиһинчаран. «Ōн ōдап?» — гунчэ̄гэчйн Дю̄р еēнмӣ сэрбэливчэрэн, 1320 Э̄ртыкй-тартыкӣ унӈэтлурэн *. « Э̄лэ̄ эмэкэд», — гунчэгэчин Э̄вэ̄кэ̄никеэ̄, илӈавāн ичэмй, Колōрӣдӯ коловурин āчин, Ичэдэдӯн ēкун урэ̄тчэн! Иркимэктэ иркин бэю̄н бараксан Ирэндэткэ̄нин тэде гудēēһи ивит.