Эвенкийские героические сказания: Храбрый Содани-богатырь. Всесильный богатырь Дэвэлчэн в расшитой-разукрашенной одежде. - 1990. [Т. 1.]

1040 Тыкэ̄н гуннэ Тӯрэлкэ̄н ōна тулдӯмулдэн, Улгӯрилкэ̄н ōнā уӈкулбулдэн: «Киӈир-киӈир киӈирдэ̄нин! Ичэкэл, ичэкэл Э̄р дулин-тукала бугаӈитын Боӈнōн-дō бэечӣ бивкӣ ивит, Ай бэелин эвэнкйл Акāри-дā урāӈкаичӣл бивкйл ивит, Бӣ ēкун уһа уйдӯв 1050 Эр ургэ дёломо колтотпй Тыкивкэ̄тнэ эвйнды? Бӣ-дэ̄ синӈэчӣн һорōн туӣ Сōт эһӣн сэнэ̄рэ бэе биһим. Кэ, кэ! Э̄р минэ Гэдумуктукив һэргискй тырэксэ̄, һуркавав этыттэ̄вй эмэчэ̄ Э̄дэр бэе, де эмэмкэ̄кэл! Дюр сōниӈ мэ̄рты Коӈнорйн улдэ колтолдивар 1060 Колтолдынал колбкōткōт, Иктэлдынэл илкикэ̄ткэ̄т! Умун кēйчā һулэгин, Ӈӣ давдывчā мунигин! Э̄нэл эрит-тарит Албаһит ӣлдырэ илэ бодо мэ̄мэ̄лдивэр Ōнйкāрбар ōлдыгат! Сӣ кēймӣ минэвэ девдиӈэ̄с, Бӣ кēймӣ, синэ сивāйбатана, Ая аһӣ Ая̄кчāн Ивēкчāнма гадиӈāв. 1070 Киӈир-киӈир киӈирдэ̄нин!» — Гуниттэн огēӈā биһэмдэ. Де тар амардукин Мит бэеӈит Иркимэктэ иркин бэю̄н авдӯлкāн Иркинйчэ̄н гунмурӣ мāтā Ева-дā барāнма энэ тӯрэ̄тчэрэ, Дэ̄птыкӣ энэ ичэһинмукэ̄нэ Дю̄р һалгалкāн ӈāлатпӣ Тыкчэрэн ивит. 1080 Чāгӯ бэе син дю̄личӣ * бидэ̄вӣ Иксāран бадага — Сōт эрэ̄-тарā чāварӣран-дā Мит бэеӈдукит ēва-дā Сот эчэ бакара. Мит бэеӈит акиндӯн ӈэнэмй, һуӈту мāтā ōдан. һāды̄лдӯн авāһи омолгин